கவிதை

முன்னால்:

முன்னால் போவது
எப்போதும் ஒரு வசதி
திரும்பிப் பார்க்க நேரும்
யாரும் வரவில்லை என்றால்
"முன்னால்" என்பதன்
புது அர்த்தம் புரியும்
புல்பூண்டற்ற வெட்டவெளியும்
வெயில் கொளுத்தும் வெட்டவானமும்
உன்னை என்ன செய்வதென்று
தவிக்கும்
    -அபி

பூஜையறை

ப்ளாஸ்டிக் மாவிலைத் தோரணங்கள்
ஸ்டிக்கர் கோலங்கள்

டப்பர்வேர் டப்பாவிலிருந்து ஊற்றுகிறார்கள்
விளக்குக்கு எண்ணெய்

ஒலிநாடா ஒப்புவிக்கும்
கந்தர் சஷ்டிக் கவசம்

கடவுள் ஏன் கல்லானான்
கேட்டான் கண்ணதாசன்
கடவுள் ஏன் பிளாஸ்டிக்கானான்
பார்த்துக் கொண்டிருக்கிறேன்

-பழனிபாரதி