சிறு குழந்தைகளுக்கு விளையாட்டு சிறந்த உடற்பயிற்சி என்று சொல்லப்படுவதில் ரகசியம் ஒன்றுள்ளது. விளையாடும்போது உடற்பயிற்சி என்னவோ நடந்துவிடுகிறது. ஆனால், உடற்பயிற்சி செய்கிறோம் என்ற எண்ணம் இருப்பதில்லை. ஆழ்ந்து இருக்கையில் அக்கம்பக்கத்திலுள்ள எதுவுமே தெரிவதில்லை. குழந்தைகள் அதிலேயே ஆழ்ந்துபோய் தான் வேறு அது வேறு என்று இல்லாத அத்வைத உணர்ச்சி பெற்றுவிடுகிறார்கள். உடல் நினைவில் இருப்பதில்லை. பசி, தாகம், களைப்பு என எதுவுமே தோன்றுவதில்லை. விளையாட்டில், உடற்பயிற்சி என்பது கடமையாக இல்லாமல் இயல்பாக நிகழ்கிறது. இதே விடயத்தை எல்லா கற்பித்தல் முறைகளுக்கும் நிகழ்த்த வேண்டும்.
மாணவர்களின் கற்றல்முறை அவர்களை அறியாமலேயே நிகழ வேண்டும். ஒரு குழந்தை தன் சிறுவயதில் தன் தாய்மொழியை இயல்பான முறையில் கற்றறிகிறது. அதே முறையில்தான் அவர்களின் மேற்படிப்பும் நிகழவேண்டும். விளக்கின் ஒளி குறையத் தொடங்குகையில் அனேகமாக அதில் எண்ணெய் இராது என்பதனை குழந்தையினாலும் அனுமானம் செய்து ஊகிக்க இயலும். இம்முடிவுக்கு உதவும் எல்லா தர்க்கங்களும் அக்குழந்தையின் மூளையில் எற்கெனவே இருக்கின்றன. கல்வி செய்யவேண்டியது அந்த ஜீவசக்திக்கு அடிக்கடி ஊட்டச்சத்து வழங்கும் சந்தர்ப்பங்களை ஏற்படுத்தித் தருவது மட்டுமே.
எல்லா சாத்தியங்களும், எல்லா கலைகளும், எல்லா நற்பண்புகளும் மனிதர்களிடம் இயல்பாகவே அமைந்துள்ளன. நமக்கு அது புலனாகாமல் இருப்பதால் விதையே இல்லை என்று சொல்லிவிடக் கூடாது. நாள்பொறுத்து முளை எழும்.
- கல்வியில் மலர்தல் குறித்து வினோபா...
கல்வி எனும் செயல்முறையை அறிவதற்கு முன்னர் கல்வி எனும் மனநிலையை புரிந்துகொள்வது அவசியமாகிறது. வினோபாவின் இப்புத்தகம் கல்வியின் அடிப்படை, ஆசிரியரின் குணத்தன்மை, எப்போதும் எதிலும் கற்கும் பண்பு, காலமும் சூழ்நிலையும் சார்ந்த விடுமுறை, செயல்பாட்டுக்கல்வி, தன்னிறைவுக் கற்றல், பூரணத்திலிருந்து பூரணம் என கல்வியின் பலபக்க பரிமாணத்தை ஒளிரப்படுத்துவதாக உள்ளது.
நவம்பர் 15, இன்று வினோபாவின் நினைவு தினம். ஒரு ஆசானாக அவரிடமிருந்து பெற்றுக்கொள்ள நிறையவிருக்கிறது என்ற காந்திய வரிகளை மனமேந்துகிறோம். நைதாலீம் எனும் நவகல்வி துவங்கி நம்மை நாமே கண்டடையும் ஆன்மக்கல்வி வரைக்கும் வினோபாவின் சொற்கள் நமக்கு வெளிச்சத்தூண்களாக நெடிதுநீண்டு நின்றிருக்கிறது. நடக்கும் கால்கள் நம்முடையது. இருள் கடப்போம்.
No comments:
Post a Comment