மனுஷ்யபுத்திரன்

பாலியல் தொழிலாளிகள் இந்த இரவில்
ஆடை மாற்றிக்கொள்வதற்குள்
செல்லாததாகிவிட்ட நோட்டுகளை
வாங்க மறுத்து கூச்சலிடுகிறார்கள்
அவர்கள்
கடன் அட்டைகளை ஏற்பதில்லை

வாடகைக் காரோட்டிகள்
நிறகாமல் செல்கிறார்கள்
அவர்கள் செல்லாத நோட்டுள்ள
வாடிக்கையாளர்களின்
முகங்களை பார்க்க விரும்பவில்லை

குடிகாரக்கணவனுக்கு தெரியாமல்
சேர்த்துவைத்த பணத்தை
எடுத்துப்பார்த்து
இந்த இரவில் ஒரு பெண் விசும்புகிறாள்
அவளுக்கு என்ன நடக்கிறது என்று தெரியவில்லை

உணவகங்களில்
ஒரே ஒரு ஐநூறு ரூபாய் நோட்டுள்ள
மனிதர்கள் பசியுடன் நின்றுகொண்டிருக்கிறார்கள்
கடைகள் வேகமாக அடைக்கப்படுகின்றன

இரண்டு நாள்
தேசத்திற்காக எல்லாவற்றையும்
பொறுத்துக்கொள்ளுங்கள்
என்கிறார் அரசர்

ஒரு எளிய மனிதனின்
இரண்டு நாள்
எவ்வளவு பெரியது
எவ்வளவு பெரியது
ஒரு செல்லாத நோட்டைப்போல
செலவழிக்கவே முடியாத
இரண்டு நாட்கள் அவை

கரையில் துள்ளும்
சிறிய மீன்களைக் கண்டு
கண் சிமிட்டுகின்றன
நீருக்கடியில்
பெரிய முதலைகள்

-மனுஷ்ய புத்திரன்