மனுஷ்யபுத்திரன்

சிரமத்திற்கு வருந்துகிறேன்
.....................................................

சிரமத்திற்கு வருந்துகிறேன்
ஒரே இரவில்
உங்கள் தன்னம்பிக்கையை சிதைத்து
பைத்தியமாக்கியதற்காக

சிரமத்திற்கு வருந்துகிறேன்
பிச்சைகாரர்களாக  வாழ்வது
என்றால் என்னவென்று
120 கோடி பேருக்கு ஒரே நேரத்தில்
உணர்த்தியதற்காக

சிரமத்திற்கு வருந்துகிறேன்
உங்கள் ஈமச்சடங்களுக்காக
நீங்கள் ரகசியமாய் சேர்த்துவைத்த பணத்திற்கு
ஈமச்சடங்கு செய்தற்காக

சிரமத்திற்கு வருந்துகிறேன்
மாடு மேய்ப்பவர்களை
ஒரே இரவில் கடன் அட்டைகளை
பயன்படுத்துபவர்களாக
மாற நிர்பந்தித்தற்காக

சிரமத்திற்கு வருந்திகிறேன்
ஒரு தேசத்தையே சில்லரைக் காசாகவும்
செல்லாக்காகவும்
மாற்றி விளையாட நேர்ந்தற்காக

சிரமத்திற்கு வருந்துகிறேன்
நோயுற்ற ஒரு குழந்தையை
செல்லாத நோட்டுக்ளுடன்
மருத்துவமனை வாசலில் சாகவிட்டதற்காக

சிரமத்திற்கு வருந்துகிறேன்
உங்கள் சொந்த குருதியின் பணத்தை
பிடுங்கிக்கொண்டு
அதை திரும்பத் தருவதற்காக
உங்களை நீண்ட வரிசையில்
முடிவற்று நிற்க வைத்ததற்காக

சிரமத்திற்கு வருந்துகிறேன்
வரிசையில் நிற்க முடியாத ஒருத்தி
திரும்பிவந்து மாடியில் இருந்து
குதித்துவிட்டதற்காக

சிரமத்திற்கு வருந்துகிறேன்
உங்கள் நகக்கணுவில்
இன்னும் எத்தனை ஊசிகளை
ஏற்றினால் நீங்கள்
பொறுமையாய் இருப்பீர்கள் என்று
சோதித்துப் பார்க்க நேர்ந்தற்காக

12. 11. 2016
மாலை 6. 44

- மனுஷ்ய புத்திரன்