சுஜாதா

*வாத்தியாரின் கடைசி வரி குறும்பு*

💥 வாலிபமே நிரந்தரமாக இருந்தால் ?
*போரடிக்கும்…*

💥வயதானதால் ஞாபக சக்தி குறையுமா சார் ?
*ஞாபகங்கள் கூடும். ஞாபக சக்தி குறையும்.*

💥பல்செட்டிலுள்ள பற்கள் கூசுமா ?
*தெரியவில்லையே. உங்களுக்குக் கூசுகிறதா என்ன ?*

💥சுஜாதாவின் (ரங்கராஜன் இல்லை சார்!) இளமையின் ரகசியம் என்ன ?
*யாண்டு பலவாகியும் நரையிலன் ஆகுதல். மீண்டும் மீண்டும் dye அடித்துக் கொள்வதால்.*

💥தள்ளாத வயது என்பது எது ?
*இளம் வயதுதான்! உப்பு, சர்க்கரை, எண்ணெய் எதையும் நீக்கித் தள்ளாமல் எல்லாவற்றையும் சாப்பிடலாம். முதுமை இவற்றையெல்லாம் விலக்கித் தள்ளும் வயது.*

💥ஒரு மனிதன் எந்த வயது வரை இளைஞனாக வாழ முடியும் ?
*இறக்கும் வரை!*

💥ஒருவன் எப்போது வயதாகி விட்டது என்பதை அப்பட்டமாக உணர்கிறான் ?
*பக்கத்து வீட்டுப் பெண் பதற்றமில்லாமல் பக்கத்தில் உட்கார்ந்து பேசும்போது!*

💥 வயதாக ஆக ஒரு விதமான அமைதி வருகிறதே, எதனால் ?
*அது அமைதி இல்லை; ஆயாசம்.*

💥நீங்கள் சிகரெட் பிடிக்க ஆரம்பித்ததற்கும், அதை விட்டதற்கும் என்ன காரணங்கள் ?
*ஆரம்பித்ததற்கு இளமை காரணம்; விட்டதற்கு இதயம் காரணம்.*

💥இவ்வளவு வயதாகியும் தாங்கள் இளமை மாறாமல் இருப்பதன் ரகசியம் என்ன ?
*தங்களைப் போன்ற இளைஞர்களின் கேள்விகளுக்கு பதிலளிக்க வேண்டியிருப்பதே.*

💥இளமையில் ஜொலித்த சினிமா இயக்குனர்களில் சிலர், முதுமையில் வெற்றி பெற முடியாமல் போவது ஏன் ?
*முதுமை அவர்கள் சினிமாவிலும் தெரிவதால்.*

💥இந்த உலகத்தில் நிம்மதியான மனிதர்கள் யார், யார் ?
*ஆரோக்கியமுள்ளவர்கள் மட்டுமே.*

💥பக்கத்து வீட்டுப் பெண் பார்க்கும்போதெல்லாம், ஒரு மாதிரி ஆகி விடுகிறதே, அது ஏன் ?

*வீடு மாற்றுங்கள்.*

💥பிரிட்னி ஸ்பியர்ஸ், ஜென்னிஃபர் லோபஸ் கேட்பதுண்டா ?

💥அவர்கள் கேட்பதற்கல்ல,
*பார்ப்பதற்கு.*