உமாமகேஸ்வரி

அவனில்லாத வீட்டில்
ஒரு நிசப்தக் குன்று வளர்கிறது
இப்போதெல்லாம் இல்லை
அலறும் தொலைக்காட்சி
இறைபட்ட புத்தகங்கள்
கொதிக்கும் செல்போன்
கலைந்து கிடக்கும் உடைகள்
பள்ளிப் பேருந்திற்கான பரபரப்பு
ஞாயிறுகளில் சிறுவர் குரல்கள்
இரையும் வாசல்
சுவரில் பந்துத் தடங்கள்
சனி இரவில் அவனோடு
ஹோட்டலுக்கான நடை.
என் சமையல் பற்றி அவன் கிண்டல்கள்.
அவனுக்கான சிறு முத்தங்கள்
இல்லை இவையேதும்.
எல்லாவற்றையும் அவன்
பிரயாணப் பைக்குள்
எடுத்துப் போயிருக்கிறான்.
இங்கிருக்கிறார்கள்
அவன் எங்கேயிருக்கிறான் என்று
கேட்பவர்கள் மட்டும்.
-உமா மகேஸ்வரி (காலச்சுவடு - செப்டம்பர்)