கழனியூரன்

கரிசல்காட்டு எழுத்தாளர் கழனியூரன் காலமானார்

நாட்டுப்புறக் கதைகளைத் தொகுத்தளித்தது உள்ளிட்ட பல விதங்களில் தமிழ் இலக்கியத்திற்குப் பங்களித்த எழுத்தாளர் கழனியூரன் இன்று காலமானார்.

எம்.எஸ்.அப்துல்காதர் என்ற இயற்பெயர் கொண்ட கழனியூரன் நெல்லை மாவட்டம் கழுநீர்குளத்தில் 1954ஆம் ஆண்டு பிறந்தார். கழனியூரன் என்ற புனைப்பெயரில் கவிதை, கதை, கட்டுரைகள் என பல முகங்களில் தன்னை வெளிப்படுத்தினார்.
எழுத்தாளர் கி.ராஜநாராயணன் தொடர்பின் மூலம் நாட்டார் வழக்காற்றியல் துறையில் நாட்டம் கொண்டு நாட்டார் கதைகளைத் தேடித்தேடித் தொகுத்ததார். நெல்லை மாவட்டத்தின் வாய்வழிக்கதைகளைச் சேகரித்து அளித்திருப்பதே இவர் ஆற்றிய பணிகளில் சிறப்பித்துக் கூறப்படுவதாகும். இப்பணியினால், செவக்காட்டு கதைசொல்லி என்ற பெயரிலும் இவர் குறிப்பிடப்படுகிறார்.

இடைநிலை ஆசிரியர் பயிற்சியும் முனைவர் பட்டமும் பெற்ற இவர், கழனியூர் தொடக்கப்பள்ளியில் ஆசிரியராகப் பணியாற்றி ஓய்வுபெற்றார்.

நெல்லை மாவட்ட கிராமியக் கதைகள், குறுஞ்சாமிகளின் கதைகள், தாத்தா பாட்டி சொன்ன கதைகள், செவக்காட்டு மக்கள் கதைகள், நெல்லை நாடோடிக் கதைகள் உள்ளிட்ட இவரது நாட்டார் கதைகளின் தொகுப்பு நூல்கள் முக்கியமானவை.