யுகபாரதி

முன்முடிவு

முழம்போட்ட மல்லிகையை
நீளம் விட்டு நறுக்கும் பூக்காரி
நல்லவளாகத் தெரிகிறாள்

உணவு மேசையில் கேட்காமல்
உபரியாய் பரிமாறும் சிப்பந்தி
நல்லவனாகத் தெரிகிறான்

எதிர்ப்படுகையில் சிரிக்கிறவர்களுக்கும்
எல்லாவற்றையும் பகிர்ந்து
கொள்கிறவர்களுக்கும்
நல்லவர்களாக தெரிகிறார்கள்

நாமும் இன்னொருவருக்கு
நல்லவராக தெரிய விரும்புகிறோம்

நல்லது என்பது தெரிவதில் இல்லை
தெரியாததிலும் உண்டு என்பது நமக்குத் தெரியாது

- யுகபாரதி